Stádas oifigiúil ag an nGaeilge sa Bhruiséil
D'eascair an cinneadh ó iarratas a rinne an Rialtas ar an tAE anuraidh chun aitheantas a thabhairt don Ghaeilge mar cheann de theangacha oifigiúla an Aontais.
Go dtí seo, b'é stádas na Gaeilge ná mar theanga chónartha, le mion-stádas, in éineacht le mion-theangacha eile.
Ach ós rud é gurb í an Ghaeilge teanga oifigiúil na tíre seo, chuir mórán chuile ceann de na heagraíochtaí ag plé le Gaeilge brú ar an Rialtas an fod a sheasamh chun ardú-céime a bhaint amach don teanga. Dar leo, bhí sé riachtanach, ar mhaithe leis ár gcultúr agus ár bhféiniúlacht, an Ghaeilge a chur ar chomh-stádas le príomh-theangacha eile na hEorpa.
D'athraigh an Rialtas a sheasamh anuraidh agus cuireadh moladh faoi bhráid sa Bhruiséil ag iarraidh athrú stádais.
Chuir an tAire Gnóthaí Pobail, Tuaithe agus Gaeltachta, Éamon Ó Cuív, fáilte roimh an gcinneadh inné.
"Lá mór don Ghaeilge é seo, a chuireann go mór le stádas na teanga," a dúirt sé.
"Nuair a bhunaíodh Conradh na Gaeilge ní raibh stádas oifigiúil ar bith ag an nGaeilge. Is iontach an dul chun cinn atá déanta ó shin."
Dúirt an tUasal Ó Cuív go gcuireann an cinneadh seo dúshlán faoi phobal na Gaeilge úsáid a bhaint as an stádas nua chun an teanga a chur chun cinn.
Ach ní chiallaíonn an stádas nua go naistreofar chuile cáipéis Eorpach go Gaeilge mar a tharlaíonn le teangacha oifigiúla eile as seo amach.
Ní thiocfaidh an cinneadh i ngníomh go hiomlán go dtí Eanáir 2007.
Faoin moladh, aistreofar go Gaeilge roinnt áirithe cáipéisí dlíthe an AE, ach ní chloífear go fóill leis an riail a chuireann ceangal ar institiúidí an Aontais achtanna uilig a aistriú go Gaeilge.
